وەدەست کەوتنی کومپیۆتەرێکی لاپتۆپ:  هەواڵی وەدەست کەوتنی کومپیۆتەرێکی لاپتوپ (laptop) کە نەهێنیەکانی وزەی ئوتومی ئێرانی تێدایە، ڕۆژی شەممەی رابردوو‌ لە لایەن رۆژنامەی نیویورک تایمزەوە بڵاو کرایەوە.
ئەو ڕۆژنامەیه هەواڵەکەی‌ لە زمانی سەرچاوە ئامریکایەکانی خۆیەوە کە نەیانویستووە ناو و کەسایەتیان دەرکەوێ، بڵاو کردووەتەوە. ئەو سەرچاونە ڕایان گەیاندووە کە گوایە لە نێوەڕاستی هاوینی ئیمساڵدا کومپیۆتەرێکی لاپتوپییان دەست کەوتووە کە ئەوانیش داویانە بە بەرپرسانی ئاژانسی نێونەتەوەیی وزەی ئوتومی. نێوەڕۆکی ئەم کومپیۆتەرە نیشان دەدا کە کۆماری ئیسلامی ئێران سەرەڕای ئەوە کە ئیدعا دەکا گوایە نیازی ئاشتیخوازانەی لە ساز کردنی وزەی ئوتومی هەیە، لە ڕاستیدا خەریکە کلاڤۆک (کلاهک)گەلێکی وزەیی ساز دەکا.
ڕۆژنامەی نیویورک تایمز هەروەها نووسیویە کە بەرپرسانی ئامریکایی لە چۆنیەتی وەدەست هێنانی ئەم کومپیۆتەرە خۆیان دەپارێزن، هۆیەکەشی ئەوەیە ئەو سەرچاوەیە کە لە نێوخۆی ئێرانەوە ئەو کومپیۆتەرەی پێداون ئاشکرا نەبێ.
ڕۆژنامەی ناوبراو نووسیویە کە ئەگەر هەبوونی ئەو کومپیۆتەرە ڕاست بێ، ئەوە بەو مانایە نییە کە ئێران خەریکە بۆمبی ئوتومی ساز بکا. نێوەڕۆکی ئەو کومپیۆتەرە ئەوە نیشان دەدا کە گوایە ئێران خەریکە کلاڤۆکی تایبەتی ئوتومی بۆ مووشەکی دوورهاوێژی شەهاب دروست بکا.
شایانی باسە کە ئێران ئەم هەواڵەی وەدرۆخستووەتەوە. هەر بۆیە وتەبێژی وەزارەتی کاروباری دەرەوەی ئێران آصفی لەم پێوەندیەدا ڕای گەیاند کە کۆماری ئیسلامی ئێران کارە نەهێنیەکانی خۆی لە ڕێگای کومپیۆتەری لاپتوپیەوە ئەنجام نادا، بەڵکو بۆ ئەم کارانە کەرەستەی تری وەک مەکینەی تلکس بەکار دێنێ.
سەرچاوه