دزینی نەرمەكاڵای هەڵسووڕێنەری ئینترنێت:  FBI له شوێن كوڕێكی شازدەساڵەی سویدی دەگەڕێ.
ئەو كوڕه لاوه سویدیە بەوه تاوانبار كراوه، ئەو نەرمەكاڵایەی دزیوه كه ئینترنێت هەڵدەسووڕێنێ.
هاوینی ساڵی پار كاتێك ئەو نەرمەكاڵایەی كه ئینترنێت هەڵدەسووڕێنێ له كومپانیای "Cisco" دزا، ئیتر لەو كاتەوه پۆلیسی ئامریكا بێ پسانەوه له شوێنه ئەو دزه دەگەڕێ، له كۆتاییدا شوێن هەڵكردنەكه سەری له كومپیۆتەرێكی زانكۆی "ئوپسالا"ی سویدەوه دەرهێنا كه له لایەن كوڕێكی 16 ساڵانەوه بەكار دێ. ئێستا لەوه دەچێ ئەم لاوه كەم تەمەنه بووبێته هۆ دزینی ئەو نەرمەكاڵایه.
رۆژنامەی نیویۆرك تایمز لەم پێوەندییەدا نووسیبووی:" كومپانیای "Cisco"  بەم دزییەی زانیبوو، بەڵام هەتاكوو بەخۆیدا هاتەوە و ئەو كەلێن و قوژبنانەی گرت كه ئەم دزییەی لێوە كرا، نەرمەكاڵاكه دزرا و له سەر ماڵپەڕێكی رووسیش بڵاو كرایەوه."
هەروەها پۆلیسی FBI شكی دەچێ كه ئەو لاوه سویدیه چووبێته نێو كومپیۆتەری هێزی لەشكەری ئامریكاوه و سەیری زانیاری زۆر زۆر گرینگی كردبێ، لەوه دەچێ بە ئەوەندەشەوه نەوەستابێ و چووبێتیشه نێو كومپیۆتەری بەڕێوەبەرانی فەزایی ئامریكا "Nasa" وه.
كومپانیای ناوبراو دەڵێ زەرەر و زیانیان زۆر پێنەگەیشتووه، بەڵام زانایەكی ئاسایشی سوید بەناوی "Jonathan James" كه پێشتر لەم جۆرە كارانەدا یارمەتی FBI داوه، لەو باوەڕەدایه كه ئەو كومپانیایه زەرەر و زیانێكی زۆری پێگەیشتووه، بەڵام نایدركێنێ.
ئێستا كومپیۆتەر‌ی ئەم لاوه سویدیه له دەست پۆلیسەی سویددایە و پێدا دەگەڕێن بۆ ئەوەی بزانن چییان دەست دەكەوێ، هەروەها پۆلیسی شاری ئوپسالا، هیچ روونكردنەوەیەكی لەسەر لێپرسینەوە لەگەڵ ئەو لاوه نەداوە به ڕاگەیەنەره گشتیەكان.