easyMusic:  سایتی easymusic.com كه بەشێكه له easyGroup بە نیازە بەرهەمی هونەرمەندە نەناسراوەکان به خۆڕایی بڵاوبکاتەوه. دیاره بەم شێوەیە گۆرانی‌و گۆرانیبێژی نەناسراو لەوانەیە بناسرێن. کارێکه، پێش دەستپێکردنیشی، بە سەرکەوتوو دادەنرێت.
لە ڕابردوو هەنگاوی وا لەلایەن زۆر هونەرمەند نراوه، بۆ پێشکەشکردنی موزیک به خۆڕا لەسەر سایتەکانیان و جێگای ئەوپەڕی ڕێزەو تەنها به کۆنسێرت‌و ئاهەنگ پارەوپوول پەیدادەکەن.
باوەڕناکەم ئەم شێوه بیرکردەوەیەی easyMusic شتێکی نوێ بێت و زیاتر ئاوێنەیەکی ڕاستییەکانە. نرخی یەک دانه \'سی.دی\' موزیک لەوانەیە لە 20 ئێورۆ زیاتربێت لە هەمان کاتدا کە هیچ گۆرانییەک نییە بە قاچاخ دانەگیرێت. گفتوگۆی گۆڕینەوە‌و داگرتنی موزیک باوەڕناکەم بەم زووانە کۆتایی پێ بێت و بەردەوامە.
ناکرێت نرخی \'سی.دی\' تەنها 3 ئێورۆ بێت؟
زۆرباش دەکرێت بەڵام گۆرانیبێزیش دەبێت سواری لیمۆزین بێت و بۆ هەر ڤیدیۆ-کلیپێک چەند ڕووتێک بەکرێ بگرێت و چاکێت‌و پانتۆڵەکەی لە ئەنقەرە بەڕادان بدات‌و بەچەند کیلۆ \'گێل\'ـێک قژی سواق بدات‌و هتد...
هەموو ئەم شتانه پێویستن‌و ئاسایین، بەڵام منی گوێگر حەقم چییه تۆی گۆرانیبێژ لەکام هوتێل دەخەویت یان کام \'شامپانیا\' دەخۆیتەوە؟ ئەم شتانه لەسەر من حیساب مەکە.
چاره: سایتێکی بچووک، تەنها یەک وێنەی گۆرانیبێژی تێدایەو هەموو گۆرانییەکانی بەخۆڕایی دادەگیرێن. ئەگەر حەزمان کرد ئاگادارمان بکەوە با \'تیکت\'ـی ئاهەنگ‌و کۆنسێرتەکانت بکڕین، ئەوانەی ئنتەرنێتیشیان نییه \'سی.دی\' ـیەکانتی بە 2 ئێورۆ بۆ ڕەوانه بکه.
مردن مردنە پەل کووتانی بۆ چییه؟